Српскиот министер за капитални инвестиции Веља Илиќ во разговор за белградски "Прес" откри дека во Србија наскоро би можела да започне изградба на патека за Формула 1.
"Идејата за изградбата на патеката во Србија произлезе лично од Берни Еклстоун, косопственикот на Формула 1. Кога Еклстоун последен пат беше во Белград со неговата сопруга Славица за прославата на православната Нова година, тој не праша мене и премиерот Коштуница зошто Србија нема ниедна посериозна патека за авто трки. Потоа, почнавме да работиме на тој проект" - изјави Илиќ за "Прес".
Наводно, веќе се пронајдени и неколку локации на кои би можела да биде изградена патеката, а неколку германски и австриски фирми веќе испратиле понуди со свои предлози за проектот.
"Стручниот тим на Еклстоун заедно со мене беше во обиколка на цела Србија во потрага по добра локација за изградбата на патеката. Една од најповолните е Трбушино поле кај Чачак, а во опција се и локации кај Сурчин и Крушевац. Локалната самоуправа би можела да го подари земјиштето за изградба, а државата би можела да се погрижи за инфраструктурата. Потоа, инвеститорите би ги направиле трибините по светските стандарди и би ја заокружиле изградбата на комплексот со пропратни содржини како трговски центри, дискотеки, кафулиња, преноќишта и слично. Спонзорите и донаторите веќе покажаа голем интерес" - изјави Илиќ.
No comments:
Post a Comment